Bu barədə Report Al Arabiya-ya istinadən xəbər verir.

"Biz İsraillə birbaşa danışıqları qətiyyətlə rədd edirik və hakimiyyətdə olanlar başa düşməlidirlər ki, onların hərəkətləri nə Livana, nə də özlərinə fayda gətirməyəcək", - Qasımın bəyanatında deyilir.

O, hakimiyyəti "Livanı qeyri-sabitlik burulğanına sürükləyən bu ağır günahdan imtina etməyə" çağırıb.

"Bu birbaşa danışıqlar və onların nəticələri bizim üçün mövcud deyil və bizə heç bir aidiyyəti yoxdur", - o əlavə edib. Onun sözlərinə görə, qrup "Livan və onun xalqı üçün müdafiə müqavimətini davam etdirəcək".

Xatırladaq ki, fevralın 28-də ABŞ və İsrail İrana qarşı hərbi əməliyyata başlayıb və bir sıra şəhərlərə zərbələr endirib. Əməliyyat Yaxın Şərqdə gərginliyin artmasına, Fars körfəzinin bütün ölkələrinin münaqişəyə cəlb olunmasına və Hörmüz boğazının blokadasına səbəb olub.

Livanın radikal qruplaşması "Hizbullah" İranın tərəfində müharibəyə qoşulub İsraili raket və PUA-larla atəşə tutduqdan sonra İsrail Müdafiə Qüvvələri (İMQ) Livanın cənubuna və radikalların infrastrukturunun yerləşdiyi Beyrutun cənub ətrafına zərbələr endirib. İsrail həmçinin Livanın cənubunda quru əməliyyatını genişləndirib.

Aprelin 14-də Vaşinqtonda ABŞ-ın himayəsi altında Livan-İsrail təmaslarının ilkin raundu keçirilib və burada atəşkəs sazişinə nail olmaq məqsədilə sülh danışıqlarına başlama tarixi müəyyən edilməli idi. Nümayəndə heyətlərinə Livan və İsrailin ABŞ-dakı səfirləri Nada Həmmadə-Müavvəd və Yexiel Layter rəhbərlik edib.

Aprelin 16-da ABŞ Prezidenti Donald Tramp İsrail və Livanın şərq vaxtı ilə saat 17:00-dan etibarən 10 günlük atəşkəs rejimi tətbiq etməyə razılaşdığını bildirib. Aprelin 24-də o, barışığın üç həftə uzadılacağını açıqlayıb.