BMT Baş katibi Antoniu Quterriş dünya liderlərini nüvə tərksilahı üçün təcili hərəkətə keçməyə çağırıb.

«Hələ gec olmamış: gəlin nüvə silahı ətrafında kollektiv amneziyanı aradan qaldıraq. Gəlin birlikdə dayandıqda nələrə nail ola biləcəyimizə inamı yeniləyək. Gəlin bəşəriyyət üzərində asılmış bu buludu dağıtmaq üçün təcili hərəkət edək», — deyə o, Nüvə Silahlarının Yayılmaması Müqaviləsinin fəaliyyətinin nəzərdən keçirilməsi üzrə 11-ci konfransın açılışında bildirib.

27 aprel Nyu-Yorkda BMT-nin baş qərargahında Nüvə Silahlarının Yayılmaması Müqaviləsi (NSYM) üzrə 11-ci icmal konfransı işə başlayıb. Hər beş ildən bir keçirilən forum müqavilənin demək olar ki, bütün iştirakçı ölkələrini — 191 dövləti birləşdirir.

Konfrans zamanı müqavilənin üç əsas istiqamət üzrə icrasının qiymətləndirilməsi planlaşdırılır: yayılmama, nüvə tərksilahı və atom enerjisindən dinc məqsədlərlə istifadə. Mövcud münaqişələr və geosiyasi fikir ayrılıqları fonunda müzakirələrin gərgin keçəcəyi gözlənilir.

Nümayəndələr konkret addımları özündə əks etdirən yekun sənədi razılaşdırmağa çalışacaqlar, lakin bir çox ekspertlər nüvə və qeyri-nüvə dövlətləri arasında dərin ziddiyyətlər səbəbindən danışıqların uğuruna şübhə edir.

Konfrans mayın 22-dək davam edəcək.